Vidura Neethi – Udyoga Parvam Chapter 33

Vidura Neethi – Udyoga Parvam Chapter 33

॥ atha śrīmahābhāratē udyōgaparvaṇi prajāgaraparvaṇi viduranītivākyē trayastriṃśō’dhyāyaḥ ॥

vaiśampāyana uvācha ।

dvāḥsthaṃ prāha mahāprājñō dhṛtarāṣṭrō mahīpatiḥ ।
viduraṃ draṣṭumichChāmi tamihānaya māchiram ॥ 1॥

prahitō dhṛtarāṣṭrēṇa dūtaḥ kṣattāramabravīt ।
īśvarastvāṃ mahārājō mahāprājña didṛkṣati ॥ 2॥

ēvamuktastu viduraḥ prāpya rājanivēśanam ।
abravīddhṛtarāṣṭrāya dvāḥstha māṃ prativēdaya ॥ 3॥

dvāḥstha uvācha ।

vidurō’yamanuprāptō rājēndra tava śāsanāt ।
draṣṭumichChati tē pādau kiṃ karōtu praśādhi mām ॥ 4॥

dhṛtarāṣṭra uvācha ।

pravēśaya mahāprājñaṃ viduraṃ dīrghadarśinam ।
ahaṃ hi vidurasyāsya nākālyō jātu darśanē ॥ 5॥

dvāḥstha uvācha ।

praviśāntaḥ puraṃ kṣattarmahārājasya dhīmataḥ ।
na hi tē darśanē’kālyō jātu rājā bravīti mām ॥ 6॥

vaiśampāyana uvācha ।

tataḥ praviśya vidurō dhṛtarāṣṭra nivēśanam ।
abravītprāñjalirvākyaṃ chintayānaṃ narādhipam ॥ 7॥

vidurō’haṃ mahāprājña samprāptastava śāsanāt ।
yadi kiṃ chana kartavyamayamasmi praśādhi mām ॥ 8॥

dhṛtaraṣtra uvācha ।

sañjayō vidura prāptō garhayitvā cha māṃ gataḥ ।
ajātaśatrōḥ śvō vākyaṃ sabhāmadhyē sa vakṣyati ॥ 9॥

tasyādya kuruvīrasya na vijñātaṃ vachō mayā ।
tanmē dahati gātrāṇi tadakārṣītprajāgaram ॥ 10॥

jāgratō dahyamānasya śrēyō yadiha paśyasi ।
tadbrūhi tvaṃ hi nastāta dharmārthakuśalō hyasi ॥ 11॥

yataḥ prāptaḥ sañjayaḥ pāṇḍavēbhyō
na mē yathāvanmanasaḥ praśāntiḥ ।
savēndriyāṇyaprakṛtiṃ gatāni
kiṃ vakṣyatītyēva hi mē’dya chintā ॥ 12॥

tanmē brūhi vidura tvaṃ yathāvan
manīṣitaṃ sarvamajātaśatrōḥ ।
yathā cha nastāta hitaṃ bhavēchcha
prajāścha sarvāḥ sukhitā bhavēyuḥ ॥- ॥

vidura uvācha ।

abhiyuktaṃ balavatā durbalaṃ hīnasādhanam ।
hṛtasvaṃ kāminaṃ chōramāviśanti prajāgarāḥ ॥ 13॥

kachchidētairmahādōṣairna spṛṣṭō’si narādhipa ।
kachchinna paravittēṣu gṛdhyanviparitapyasē ॥ 14॥

dhṛtarāṣṭra uvācha ।

śrōtumichChāmi tē dharmyaṃ paraṃ naiḥśrēyasaṃ vachaḥ ।
asminrājarṣivaṃśē hi tvamēkaḥ prājñasammataḥ ॥ 15॥

vidura uvācha ।

rajā lakṣaṇasampannastrailōkyasyādhipō bhavēt ।
prēṣyastē prēṣitaśchaiva dhṛtarāṣṭra yudhiṣṭhiraḥ ॥- ॥

viparītataraścha tvaṃ bhāgadhēyē na sammataḥ ।
archiṣāṃ prakṣayāchchaiva dharmātmā dharmakōvidaḥ ॥- ॥

ānṛśaṃsyādanukrōśāddharmātsatyātparākramāt ।
gurutvāttvayi samprēkṣya bahūnklēṣāṃstitikṣatē ॥- ॥

duryōdhanē saubalē cha karṇē duḥśāsanē tathā ।
ētēṣvaiśvaryamādhāya kathaṃ tvaṃ bhūtimichChasi ॥- ॥

ēkasmātvṛkṣādyajñapatrāṇi rājan
srukcha drauṇī pēṭhanīpīḍanē cha ।
ētasmādrājanbruvatō mē nibōdha
ēkasmādvai jāyatē’sachcha sachcha ॥- ॥

ātmajñānaṃ samārambhastitikṣā dharmanityatā ।
yamarthānnāpakarṣanti sa vai paṇdita uchyatē ॥- ॥

niṣēvatē praśastāni ninditāni na sēvatē ।
anāstikaḥ śraddadhāna ētatpaṇḍita lakṣaṇam ॥ 16॥

krōdhō harṣaścha darpaścha hrīstambhō mānyamānitā ।
yamarthānnāpakarṣanti sa vai paṇḍita uchyatē ॥ 17॥

yasya kṛtyaṃ na jānanti mantraṃ vā mantritaṃ parē ।
kṛtamēvāsya jānanti sa vai paṇḍita uchyatē ॥ 18॥

yasya kṛtyaṃ na vighnanti śītamuṣṇaṃ bhayaṃ ratiḥ ।
samṛddhirasamṛddhirvā sa vai paṇḍita uchyatē ॥ 19॥

yasya saṃsāriṇī prajñā dharmārthāvanuvartatē ।
kāmādarthaṃ vṛṇītē yaḥ sa vai paṇḍita uchyatē ॥ 20॥

yathāśakti chikīrṣanti yathāśakti cha kurvatē ।
na kiṃ chidavamanyantē paṇḍitā bharatarṣabha ॥ 21॥

kṣipraṃ vijānāti chiraṃ śṛṇōti
vijñāya chārthaṃ bhajatē na kāmāt ।
nāsampṛṣṭō vyaupayuṅktē parārthē
tatprajñānaṃ prathamaṃ paṇḍitasya ॥ 22॥

nāprāpyamabhivāñChanti naṣṭaṃ nēchChanti śōchitum ।
āpatsu cha na muhyanti narāḥ paṇḍita buddhayaḥ ॥ 23॥

niśchitya yaḥ prakramatē nāntarvasati karmaṇaḥ ।
avandhya kālō vaśyātmā sa vai paṇḍita uchyatē ॥ 24॥

ārya karmaṇi rājyantē bhūtikarmāṇi kurvatē ।
hitaṃ cha nābhyasūyanti paṇḍitā bharatarṣabha ॥ 25॥

na hṛṣyatyātmasammānē nāvamānēna tapyatē ।
gāṅgō hrada ivākṣōbhyō yaḥ sa paṇḍita uchyatē ॥ 26॥

tattvajñaḥ sarvabhūtānāṃ yōgajñaḥ sarvakarmaṇām ।
upāyajñō manuṣyāṇāṃ naraḥ paṇḍita uchyatē ॥ 27॥

pravṛtta vākchitrakatha ūhavānpratibhānavān ।
āśu granthasya vaktā cha sa vai paṇḍita uchyatē ॥ 28॥

śrutaṃ prajñānugaṃ yasya prajñā chaiva śrutānugā ।
asambhinnārya maryādaḥ paṇḍitākhyāṃ labhēta saḥ ॥ 29॥

arthaṃ mahāntamāsadya vidyāmaiśvaryamēva cha ।
vicharatyasamunnaddhō yasya paṇḍita uchyatē ॥- ॥

aśrutaścha samunnaddhō daridraścha mahāmanāḥ ।
arthāṃśchākarmaṇā prēpsurmūḍha ityuchyatē budhaiḥ ॥ 30॥

svamarthaṃ yaḥ parityajya parārthamanutiṣṭhati ।
mithyā charati mitrārthē yaścha mūḍhaḥ sa uchyatē ॥ 31॥

akāmāṃ kāmayati yaḥ kāmayānāṃ parityajēt ।
balavantaṃ cha yō dvēṣṭi tamāhurmūḍhachētasam ॥- ॥

akāmānkāmayati yaḥ kāmayānānparidviṣan ।
balavantaṃ cha yō dvēṣṭi tamāhurmūḍhachētasam ॥ 32॥

amitraṃ kurutē mitraṃ mitraṃ dvēṣṭi hinasti cha ।
karma chārabhatē duṣṭaṃ tamāhurmūḍhachētasam ॥ 33॥

saṃsārayati kṛtyāni sarvatra vichikitsatē ।
chiraṃ karōti kṣiprārthē sa mūḍhō bharatarṣabha ॥ 34॥

śrāddhaṃ pitṛbhyō na dadāti daivatāni nārchati ।
suhṛnmitraṃ na labhatē tamāhurmūḍhachētasam ॥- ॥

anāhūtaḥ praviśati apṛṣṭō bahu bhāṣatē ।
viśvasatyapramattēṣu mūḍha chētā narādhamaḥ ॥ 35॥

paraṃ kṣipati dōṣēṇa vartamānaḥ svayaṃ tathā ।
yaścha krudhyatyanīśaḥ sansa cha mūḍhatamō naraḥ ॥ 36॥

ātmanō balamājñāya dharmārthaparivarjitam ।
alabhyamichChannaiṣkarmyānmūḍha buddhirihōchyatē ॥ 37॥

aśiṣyaṃ śāsti yō rājanyaścha śūnyamupāsatē ।
kadaryaṃ bhajatē yaścha tamāhurmūḍhachētasam ॥ 38॥

arthaṃ mahāntamāsādya vidyāmaiśvaryamēva vā ।
vicharatyasamunnaddhō yaḥ sa paṇḍita uchyatē ॥ 39॥

ēkaḥ sampannamaśnāti vastē vāsaścha śōbhanam ।
yō’saṃvibhajya bhṛtyēbhyaḥ kō nṛśaṃsatarastataḥ ॥ 40॥

ēkaḥ pāpāni kurutē phalaṃ bhuṅktē mahājanaḥ ।
bhōktārō vipramuchyantē kartā dōṣēṇa lipyatē ॥ 41॥

ēkaṃ hanyānna vāhanyādiṣurmuktō dhanuṣmatā ।
buddhirbuddhimatōtsṛṣṭā hanyādrāṣṭraṃ sarājakam ॥ 42॥

ēkayā dvē viniśchitya trīṃśchaturbhirvaśē kuru ।
pañcha jitvā viditvā ṣaṭsapta hitvā sukhī bhava ॥ 43॥

ēkaṃ viṣarasō hanti śastrēṇaikaścha vadhyatē ।
sarāṣṭraṃ sa prajaṃ hanti rājānaṃ mantravisravaḥ ॥ 44॥

ēkaḥ svādu na bhuñjīta ēkaśchārthānna chintayēt ।
ēkō na gachChēdadhvānaṃ naikaḥ suptēṣu jāgṛyāt ॥ 45॥

ēkamēvādvitīyaṃ tadyadrājannāvabudhyasē ।
satyaṃ svargasya sōpānaṃ pārāvārasya nauriva ॥ 46॥

ēkaḥ kṣamāvatāṃ dōṣō dvitīyō nōpalabhyatē ।
yadēnaṃ kṣamayā yuktamaśaktaṃ manyatē janaḥ ॥ 47॥

sō’sya dōṣō na mantavyaḥ kṣamā hi paramaṃ balam ।
kṣamā guṇō hyaśaktānāṃ śaktānāṃ bhūṣaṇaṃ tathā ॥- ॥

kṣamā vaśīkṛtirlōkē kṣamayā kiṃ na sādhyatē ।
śāntiśaṅkhaḥ karē yasya kiṃ kariṣyati durjanaḥ ॥- ॥

atṛṇē patitō vahniḥ svayamēvōpaśāmyati ।
akṣamāvānparaṃ dōṣairātmānṃ chaiva yōjayēt ॥- ॥

ēkō dharmaḥ paraṃ śrēyaḥ kṣamaikā śāntiruttamā ।
vidyaikā paramā dṛṣṭirahiṃsaikā sukhāvahā ॥ 48॥

dvāvimau grasatē bhūmiḥ sarpō bilaśayāniva ।
rājānaṃ chāvirōddhāraṃ brāhmaṇaṃ chāpravāsinam ॥ 49॥

dvē karmaṇī naraḥ kurvannasmiँllōkē virōchatē ।
abruvanparuṣaṃ kiṃ chidasatō nārthayaṃstathā ॥ 50॥

dvāvimau puruṣavyāghra parapratyaya kāriṇau ।
striyaḥ kāmita kāminyō lōkaḥ pūjita pūjakaḥ ॥ 51॥

dvāvimau kaṇṭakau tīkṣṇau śarīrapariśōṣaṇau ।
yaśchādhanaḥ kāmayatē yaścha kupyatyanīśvaraḥ ॥ 52॥

dvāvēva na virājētē viparītēna karmaṇā ।
gṛhasthaścha nirārambhaḥ kāryavāṃśchaiva bhikṣukaḥ ॥- ॥

dvāvimau puruṣau rājansvargasya pari tiṣṭhataḥ ।
prabhuścha kṣamayā yuktō daridraścha pradānavān ॥ 53॥

nyāyāgatasya dravyasya bōddhavyau dvāvatikramau ।
apātrē pratipattiścha pātrē chāpratipādanam ॥ 54॥

dvāvambhasi nivēṣṭavyau galē baddhvā dṛḍhaṃ śilām ।
dhanavantamadātāraṃ daridraṃ chātapasvinam ॥- ॥

dvāvimau puruṣavyāghra suryamaṇḍalabhēdinau ।
parivrāḍyōgayuktaścha raṇē chābhimukhō hataḥ ॥- ॥

trayō nyāyā manuṣyāṇāṃ śrūyantē bharatarṣabha ।
kanīyānmadhyamaḥ śrēṣṭha iti vēdavidō viduḥ ॥ 55॥

trividhāḥ puruṣā rājannuttamādhamamadhyamāḥ ।
niyōjayēdyathāvattāṃstrividhēṣvēva karmasu ॥ 56॥

traya ēvādhanā rājanbhāryā dāsastathā sutaḥ ।
yattē samadhigachChanti yasya tē tasya taddhanam ॥ 57॥

haraṇaṃ cha parasvānāṃ paradārābhimarśanam ।
suhṛdaścha parityāgastrayō dōṣā kṣayāvahaḥ ॥- ॥

trividhaṃ narakasyēdaṃ dvāraṃ nāśanamātmanaḥ ।
kāmaḥ krōdhastathā lōbhastasmādētattrayaṃ tyajēt ॥- ॥

varapradānaṃ rājyāṃ cha putrajanma cha bhārata ।
śatrōścha mōkṣaṇaṃ kṛchChrāttrīṇi chaikaṃ cha tatsamam ॥- ॥

bhaktaṃ cha bajamānaṃ cha tavāsmīti vādinam ।
trīnētān śaraṇaṃ prāptānviṣamē’pi na santyajēt ॥- ॥

chatvāri rājñā tu mahābalēna
varjyānyāhuḥ paṇḍitastāni vidyāt ।
alpaprajñaiḥ saha mantraṃ na kuryān
na dīrghasūtrairalasaiśchāraṇaiścha ॥ 58॥

chatvāri tē tāta gṛhē vasantu
śriyābhijuṣṭasya gṛhastha dharmē ।
vṛddhō jñātiravasannaḥ kulīnaḥ
sakhā daridrō bhaginī chānapatyā ॥ 59॥

chatvāryāha mahārāja sadyaskāni bṛhaspatiḥ ।
pṛchChatē tridaśēndrāya tānīmāni nibōdha mē ॥ 60॥

dēvatānāṃ cha saṅkalpamanubhāvaṃ cha dhīmatām ।
vinayaṃ kṛtavidyānāṃ vināśaṃ pāpakarmaṇām ॥ 61॥

chatvāri karmāṇyabhayaṅkarāṇi
bhayaṃ prayachChantyayathākṛtāni ।
mānāgnihōtraṃ uta mānamaunaṃ
mānēnādhītamuta mānayajñaḥ ॥- ॥

pañchāgnayō manuṣyēṇa paricharyāḥ prayatnataḥ ।
pitā mātāgnirātmā cha guruścha bharatarṣabha ॥ 62॥

pañchaiva pūjayaँllōkē yaśaḥ prāpnōti kēvalam ।
dēvānpitṝnmanuṣyāṃścha bhikṣūnatithipañchamān ॥ 63॥

pañcha tvānugamiṣyanti yatra yatra gamiṣyasi ।
mitrāṇyamitrā madhyasthā upajīvyōpajīvinaḥ ॥ 64॥

pañchēndriyasya martyasya Chidraṃ chēdēkamindriyam ।
tatō’sya sravati prajñā dṛtēḥ pādādivōdakam ॥ 65॥

ṣaḍdōṣāḥ puruṣēṇēha hātavyā bhūtimichChatā ।
nidrā tandrī bhayaṃ krōdha ālasyaṃ dīrghasūtratā ॥ 66॥

ṣaḍimānpuruṣō jahyādbhinnāṃ nāvamivārṇavē ।
apravaktāramāchāryamanadhīyānamṛtvijam ॥ 67॥

arakṣitāraṃ rājānaṃ bhāryāṃ chāpriya vādinīm ।
grāmakāraṃ cha gōpālaṃ vanakāmaṃ cha nāpitam ॥ 68॥

ṣaḍēva tu guṇāḥ puṃsā na hātavyāḥ kadāchana ।
satyaṃ dānamanālasyamanasūyā kṣamā dhṛtiḥ ॥ 69॥

arthāgamō nityamarōgitā cha
priyā cha bhāryā priyavādinī cha ।
vaśyaścha putrō’rthakarī cha vidyā
ṣaṭ jīvalōkasya sukhāni rājan ॥- ॥

ṣaṇṇāmātmani nityānāmaiśvaryaṃ yō’dhigachChati ।
na sa pāpaiḥ kutō’narthairyujyatē vijitēndriyaḥ ॥ 70॥

ṣaḍimē ṣaṭsu jīvanti saptamō nōpalabhyatē ।
chōrāḥ pramattē jīvanti vyādhitēṣu chikitsakāḥ ॥ 71॥

pramadāḥ kāmayānēṣu yajamānēṣu yājakāḥ ।
rājā vivadamānēṣu nityaṃ mūrkhēṣu paṇḍitāḥ ॥ 72॥

ṣaḍimāni vinaśyanti muhūrtamanavēkṣaṇāt ।
gāvaḥ sēvā kṛṣirbhāryā vidyā vṛṣalasaṅgatiḥ ॥- ॥

ṣaḍētē hyavamanyantē nityaṃ pūrvōpakāriṇam ।
āchāryaṃ śikṣitā śiṣyāḥ kṛtadāraścha mātaram ॥- ॥

nāriṃ vigatakāmastu kṛtārthāścha prayōjakam ।
nāvaṃ nistīrṇakāntārā nāturāścha chikitsakam ॥- ॥

ārōgyamānṛṇyamavipravāsaḥ
sadbhirmanuṣyaiḥ saha samprayōgaḥ ।
svapratyayā vṛttirabhītavāsaḥ
ṣaṭ jīvalōkasya sukhāni rājan ॥- ॥

īrṣurghṛṇī nasantuṣṭaḥ krōdhanō nityaśaṅkitaḥ ।
parabhāgyōpajīvī cha ṣaḍētē nityaduḥkhitāḥ ॥- ॥

sapta dōṣāḥ sadā rājñā hātavyā vyasanōdayāḥ ।
prāyaśō yairvinaśyanti kṛtamūlāścha pārthivāḥ ॥ 73॥

striyō’kṣā mṛgayā pānaṃ vākpāruṣyaṃ cha pañchamam ।
mahachcha daṇḍapāruṣyamarthadūṣaṇamēva cha ॥ 74॥

aṣṭau pūrvanimittāni narasya vinaśiṣyataḥ ।
brāhmaṇānprathamaṃ dvēṣṭi brāhmaṇaiścha virudhyatē ॥ 75॥

brāhmaṇa svāni chādattē brāhmaṇāṃścha jighāṃsati ।
ramatē nindayā chaiṣāṃ praśaṃsāṃ nābhinandati ॥ 76॥

naitānsmarati kṛtyēṣu yāchitaśchābhyasūyati ।
ētāndōṣānnaraḥ prājñō buddhyā buddhvā vivarjayēt ॥ 77॥

aṣṭāvimāni harṣasya nava nītāni bhārata ।
vartamānāni dṛśyantē tānyēva susukhānyapi ॥ 78॥

samāgamaścha sakhibhirmahāṃśchaiva dhanāgamaḥ ।
putrēṇa cha pariṣvaṅgaḥ sannipātaścha maithunē ॥ 79॥

samayē cha priyālāpaḥ svayūthēṣu cha sannatiḥ ।
abhiprētasya lābhaścha pūjā cha janasaṃsadi ॥ 80॥

aṣṭau guṇāḥ puruṣaṃ dīpayanti
prajñā cha kaulyaṃ cha damaḥ śrutaṃ cha ।
parākramaśchābahubhāṣitā cha
dānaṃ yathāśakti kṛtajñatā cha ॥- ॥

navadvāramidaṃ vēśma tristhūṇaṃ pañcha sākṣikam ।
kṣētrajñādhiṣṭhitaṃ vidvānyō vēda sa paraḥ kaviḥ ॥ 81॥

daśa dharmaṃ na jānanti dhṛtarāṣṭra nibōdha tān ।
mattaḥ pramatta unmattaḥ śrāntaḥ kruddhō bubhukṣitaḥ ॥ 82॥

tvaramāṇaścha bhīruścha lubdhaḥ kāmī cha tē daśa ।
tasmādētēṣu bhāvēṣu na prasajjēta paṇḍitaḥ ॥ 83॥

atraivōdāharantīmamitihāsaṃ purātanam ।
putrārthamasurēndrēṇa gītaṃ chaiva sudhanvanā ॥ 84॥

yaḥ kāmamanyū prajahāti rājā
pātrē pratiṣṭhāpayatē dhanaṃ cha ।
viśēṣavichChrutavānkṣiprakārī
taṃ sarvalōkaḥ kurutē pramāṇam ॥ 85॥

jānāti viśvāsayituṃ manuṣyān
vijñāta dōṣēṣu dadhāti daṇḍam ।
jānāti mātrāṃ cha tathā kṣamāṃ cha
taṃ tādṛśaṃ śrīrjuṣatē samagrā ॥ 86॥

sudurbalaṃ nāvajānāti kañchid-
yuktō ripuṃ sēvatē buddhipūrvam ।
na vigrahaṃ rōchayatē balasthaiḥ
kālē cha yō vikramatē sa dhīraḥ ॥ 87॥

prāpyāpadaṃ na vyathatē kadā chid
udyōgamanvichChati chāpramattaḥ ।
duḥkhaṃ cha kālē sahatē jitātmā
dhurandharastasya jitāḥ sapatnāḥ ॥ 88॥

anarthakaṃ vipra vāsaṃ gṛhēbhyaḥ
pāpaiḥ sandhiṃ paradārābhimarśam ।
dambhaṃ stainyaṃ paiśunaṃ madya pānaṃ
na sēvatē yaḥ sa sukhī sadaiva ॥ 89॥

na saṃrambhēṇārabhatē’rthavargam
ākāritaḥ śaṃsati tathyamēva ।
na mātrārthē rōchayatē vivādaṃ
nāpūjitaḥ kupyati chāpyamūḍhaḥ ॥ 90॥

na yō’bhyasūyatyanukampatē cha
na durbalaḥ prātibhāvyaṃ karōti ।
nātyāha kiṃ chitkṣamatē vivādaṃ
sarvatra tādṛglabhatē praśaṃsām ॥ 91॥

yō nōddhataṃ kurutē jātu vēṣaṃ
na pauruṣēṇāpi vikatthatē’nyān ।
na mūrchChitaḥ kaṭukānyāha kiṃ chit
priyaṃ sadā taṃ kurutē janō’pi ॥ 92॥

na vairamuddīpayati praśāntaṃ
na darmamārōhati nāstamēti ।
na durgatō’smīti karōti manyuṃ
tamārya śīlaṃ paramāhuragryam ॥ 93॥

na svē sukhē vai kurutē praharṣaṃ
nānyasya duḥkhē bhavati pratītaḥ ।
dattvā na paśchātkurutē’nutāpaṃ
na katthatē satpuruṣārya śīlaḥ ॥ 94॥

dēśāchārānsamayāñjātidharmān
bubhūṣatē yastu parāvarajñaḥ ।
sa tatra tatrādhigataḥ sadaiva
mahājanasyādhipatyaṃ karōti ॥ 95॥

dambhaṃ mōhaṃ matsaraṃ pāpakṛtyaṃ
rājadviṣṭaṃ paiśunaṃ pūgavairam ।
mattōnmattairdurjanaiśchāpi vādaṃ
yaḥ prajñāvānvarjayētsa pradhānaḥ ॥ 96॥

damaṃ śauchaṃ daivataṃ maṅgalāni
prāyaśchittaṃ vividhāँllōkavādān ।
ētāni yaḥ kurutē naityakāni
tasyōtthānaṃ dēvatā rādhayanti ॥ 97॥

samairvivāhaṃ kurutē na hīnaiḥ
samaiḥ sakhyaṃ vyavahāraṃ kathāścha ।
guṇairviśiṣṭāṃścha purō dadhāti
vipaśchitastasya nayāḥ sunītāḥ ॥ 98॥

mitaṃ bhuṅktē saṃvibhajyāśritēbhyō
mitaṃ svapityamitaṃ karmakṛtvā ।
dadātyamitrēṣvapi yāchitaḥ saṃ-
stamātmavantaṃ prajahātyanarthāḥ ॥ 99॥

chikīrṣitaṃ viprakṛtaṃ cha yasya
nānyē janāḥ karma jānanti kiṃ chit ।
mantrē guptē samyaganuṣṭhitē cha
svalpō nāsya vyathatē kaśchidarthaḥ ॥ 100॥

yaḥ sarvabhūtapraśamē niviṣṭaḥ
satyō mṛdurdānakṛchChuddha bhāvaḥ ।
atīva sañjñāyatē jñātimadhyē
mahāmaṇirjātya iva prasannaḥ ॥ 101॥

ya ātmanāpatrapatē bhṛśaṃ naraḥ
sa sarvalōkasya gururbhavatyuta ।
ananta tējāḥ sumanāḥ samāhitaḥ
svatējasā sūrya ivāvabhāsatē ॥ 102॥

vanē jātāḥ śāpadagdhasya rājñaḥ
pāṇḍōḥ putrāḥ pañcha pañchēndra kalpāḥ ।
tvayaiva bālā vardhitāḥ śikṣitāścha
tavādēśaṃ pālayantyāmbikēya ॥ 103॥

pradāyaiṣāmuchitaṃ tāta rājyaṃ
sukhī putraiḥ sahitō mōdamānaḥ ।
na dēvānāṃ nāpi cha mānuṣāṇāṃ
bhaviṣyasi tvaṃ tarkaṇīyō narēndra ॥ 104॥

॥ iti śrīmahābhāratē udyōgaparvaṇi prajāgaraparvaṇi
viduranītivākyē trayastriṃśō’dhyāyaḥ ॥ 33 ॥